Trøbbel i tårnet?

Me har om dialektar på skulen no: Rulling og skarring på r-ane. Blaute og ikkje-blaute konsonantar. Likevel er det noko eg tykkjer er rart. Stadig fleire har slutta å bruke "kj-lyden" når dei snakkar. Ord som kino, kylling, køyra og kjekt, blir til chino, chylling, chøyra og chekt. Eg for min del, tykkjer ikkje at det gjer så mykje, men etter som eg har tenkt litt har eg kome fram til at me gjer det vanskelegare for oss sjølv dersom me ikkje skiljar mellom "kj" og "skj-lyden". Det kan nemleg gå utover rettskrivinga.

For ikkje lenge sidan var eg på traffikalt. Dei fleste fekk med seg alt, men det var likevel noko som eg og andre ikkje kunne la være og hengje oss opp i. Me chørte bil i staden for å køyra han. I rundchøringane var det også mykje og passa på, og når du byrjar på chøreskule treng du eit timekort. Skal ikkje ein køyrelærar kunne uttale sitt vanlegaste og mest brukte ord riktig?

Likevel forstår eg at det blir litt trøbbel i tårnet. Eg trur at det har mykje å seie kva foreldra dine har lært deg opp til. Då eg var lita sa eg alltid chino og chekt, trur eg i alle fall. Det gjorde Trine også. Mamma og far hengte seg stadig opp i det, og retta på oss. Det er eg eigentleg glad for. Eg har ikkje lyst å bli ei gammal kone som steiker chøttkaker på chøkkenet, trur eg…

Kva tykkjer du om denne utviklinga? Er det greit at "kj-lyden" blir borte?